Tillevisie

Afgelopen tied was ik geregeld onderweg naor éne van de Achterhookse gemeenten veur de Wiesneus les. Eén uurken dialectles op de basisschole veur kindere tussen acht en tien jaor.

Bienao altied begon ik met de vraoge wee of der een betken plat kon praoten. Meestal stakken dan een paar kindere veurzichteg de vinger op. “Mijn opa en oma praten altijd plat en mijn vader en moeder doen het ook met elkaar, maar niet met ons”, was ‘n antwoord wa’k vake krege. Wat jammer is dat en wat lao’w ’n kansen veur ’t behold van de streektaal liggen a’w unze (klein)kindere der neet een betjen van leert. Dat ene uurken, is natuurlek maor ne dröppel op de gleujende plate. Maor de kindere hebt der wal schik in, ze doot tenminste enthousiast met. En a’k op ’t ende van de lesse vraoge of ze wet wat ’t betekent a’j vraogt of ze ’t good wies kapot hebt, dan wet der toch verrassend völle ’t antwoord. “Dat zegt mijn moeder ook wel eens tegen mij”.

Behalve dialectlessen veur legere en middelbaore schole hef ’t Erfgoedcentrum Achterhoek en Liemers ok cursussen veur volwassenen. De cursus Achterhook(s) is al veer keer helemaol vol eboekt ewes en der bunt alweer anvraogen veur ne nieje serie. De cursisten bunt Achterhokers dee meer van de taal wilt leren en ok “inburgeraars” dee endeleks de buurman wilt können verstaon of wat meer wilt weten van de gebroeken, en de natuur en cultuur van de Achterhook. Vake heur ik van de Achterhookse cursisten dat ze ’t jammer vindt dat ze vrogger thoes neet wat meer dialect eleerd hebt. Oet angst dat kindere met een accent gin carrière konnen maken wodden der meestal allene maor Nederlands met eur epraot. Vake bunt unze olde leu toch te bange ewes…

in de mooiste tied van ’t jaor wazzen de ritjes naor de scholen trouwens een feest op zich. Wat ’n veurrecht da’w in dit prachtege deel van uns land mögt wonnen en warken. Daor mö’w wal luk greutser op wezzen net as op de taal dee daor bi-j heurt.

___________________________________________________________________

Columns

Maandblad MIJN Magazine heeft columns van verschillende Achterhoekse columnisten. Meer columns? Klik dan op de bijbehorende link! https://www.helemaalachterhoek.nl/category/mijnmagazine/columns/

Geef een reactie

Het e-mailadres wordt niet gepubliceerd. Vereiste velden zijn gemarkeerd met *