Dizze wekke kriegt wiej in hoes nen traplift. Den is veur miej, want ik kan neet meer baoven kommen. Bun noe al veer kere evallen en daordeur kan ik neet meer zo good lopen. Ik heb al wel ne rollator, waor ik met rond kan kommen, maor dat geet ok steurig meender.
Vanmorgen bun‛k nog evallen met de rollator. Ik wol naor de wc hen gaon, ik ston op oet berre en daornaor bun‛k evallen. Et deet nog zeer ok, ik kon ok neet meer aoverende kommen. He‛k eerst mien man ebeld, den was al op zien wark, dat was ik helemool vergetten. Hee wol wal kommen, maor ik heb toch miene zunne oet berre ebeld. Hee hef miej wier in berre ekregen, et ging neet makkelijk, maor ik zat wier in berre. Alles was nog heel, behalve ikke.
Jao heel word ik neet meer. De borstkanker is oet-ezaaid in miene rug en in mien heufd. Ik kriege noe chemotabletten en veurige wekke he‛ k nen MRI-scan en nen Pet-scan ehad. De oncoloog von et der wal good oetzeen. De tumor in mien heufd was eslonken, maor de tumor in miene rug konden ze neet völle aover zeggen. Ik hoppe dat ze token wekke, a‛k wier op sprekuur mag kommen, dat ze dan wal oetslag hebt. Dan hop ik dat de oncoloog wier zo bliej is as de letste keer.
Ik heb de hele wekke nog neet onder de douche estoon. At de traplifte der straks is, dan gao ik dreks onder de waterstraole staon. Lekker eavn nat worden, insmeren met good geurende roekerieje. Ik heb zo‛n douchesteulken waor ik op zit a‛k gao douchen. Et past allemoale net. Dat douchesteulken he‛w eleend biej et zeekenhoes. In april wilt ze et steulken terug hebben, maor dat geet neet lukken. Dan koop ik um wal.
Jao zeek wean is neet makkelijk. Da‛j wet da‛j dood gaot is ok neet fijn, maor zo is et leaven en daor mo‛j et maor met doon. Ik hoppe toch ne oalde vrouwe de worden. Zo he‛k al es edreumt, da‛k 59 jaor zol worden, das ok neet oald, maor wal oalder dan 50 jaor wat ik noe bun.
Annemarie Damveld
___________________________________________________________________
Columns
Maandblad MIJN Magazine heeft columns van verschillende Achterhoekse columnisten. Meer columns? Klik dan op de bijbehorende link! https://www.helemaalachterhoek.nl/category/mijnmagazine/columns/
