etten oet de natuur

De roller coaster

Zo onverwochtents stap i-j in ’n wagonneken. I-j hebt der gineens veur in de riege estaon, nee i-j was geliek an bod, i-j gaot zitten en dan godsgaanselik langzaam en met hörte en stötte geet ’t wagonneken ’n hogen barg op. I-j kiekt geneugelijk um oe hen naor de mooie umgeving, oe van gin gevaor bewust. Ut laeven is mooi en zonder wietere ongemakken.

Dan kom ie an op de top. ’t Oetzicht is merakels prachtig. Ie hebt der onmeundigen skik an. I-j zeet ut laeven as een groot feest, tötdat ’t wagonneken bots aoverhelt, dan zee‛j ne deepe ofgrond veur oe opdoemen.

Ene luttele seconde steet ’t wagonneken kats stille… dan pleert ’t zik met ’n rotgaank dale, i-j könt der niks an holden, i-j hebt der gin controle aover. As ’n dollen raos i-j met ’n hoge snelheid de ofgrond in, ook scharpe bochten deur en gao‛j aover de kop. I-j mot der maor op vertrouwen, da‛j met wagonneken en al, good op de riegels blieft en da‛j alle hindernissen zoonder ongelukken wet te nemmen. Da‛j neet oet de loepings vleegt, dee‛j oonderwegns ok nog is teagenkomt. Ut zweet brekt oe oet en i-j vangt an te gillen.

Jao, met de griwwel op ’n nakn laot i-j de rit aover oe hen kommen. I-j blieft de hoppe holden, da‛j temet veilig ’t eindstation haalt, maor waor is ’t eindstation? Hoo lange duurt dizzen dollemansrit? Kom i-j hier ooit wier oet? Wat kump der nao dizzen rit? Allemaole vraogen, waor‛j gin antwoord op kriegt.

Zo veulen ik mi-j, toen ik te heuren kreeg dat ik borstkanker had. Ik zat in dat wagonneken, ik heb zelfs probeerd um van den dollemansrit te genieten, ok al wol ik leaver heel hard wegrennen en gillen da‛k der oet wol, dat ’t wagonneken mos stoppen, ik wette wal, dat ’t neet kon. Was ik maor nooit in-estapt in dizze achtbaan. Tja noe was ’t te late en mos ik de rit oetzitten en derop vertrouwen da‛k zonder wietere kleerscheuren ’t eindstation zol halen. Da‛k temet kon oetstappen en met ’n good geveul derop terugge kon kieken, da‛k kon zeggen: Wauw ’t was toch ’n gave rit, allenig ik doo ’t nimmer wier en ik raod dizze roller coaster ok an gin andere leu an.

Noh, gelukkig is den roller coasterrit allemaole good  ekommen. Maor noe zit ik wier in nen ni-je roller coaster en dit maol aoverlaef ik ut neet.

Annemarie Damveld

___________________________________________________________________

Columns

Maandblad MIJN Magazine heeft columns van verschillende Achterhoekse columnisten. Ook meer columns? Klik dan op de bijbehorende link! https://www.helemaalachterhoek.nl/category/mijnmagazine/columns/

Verder lezen

Ebbers Mechanisatie
Bedrijfspresentaties

Automowers: voor een perfect gazon

De landbouw staat onder druk. Ebbers Mechanisatie ondervindt er geen last van. Integendeel, het bedrijf in Winterswijk-Huppel maakt zelfs een mooie groei door. Klanten zijn uitermate tevreden over het uitgebreide

Geef een reactie

Het e-mailadres wordt niet gepubliceerd. Vereiste velden zijn gemarkeerd met *