De ondergaonde zunne trakteert ‘s aovends vake op prachteg golden aovendlecht. A’k aover de olde spoorbane lope geniet ik daorvan en zee’k bienao altied reeën lopen. Eerst wazzen ze met zien dreeën, maor ene hef zich af-ezonderd en is inmiddels moder van twee kelfkes. Regelmaoteg leep ze in ’t lange heujgrös, maor ton dat emaejt mos wodden hef ze zich ne andere stae ezoch met eur kroost. Op ‘n aovend zag ik eur weer weiden. Nèt ton’k eur op de foto wol zetten kwammen d’r een paar late fietsers an. Ze schrok, maken zich lank en met een paar flinke sprunge was ze weer weg ’n bos in.
Indertied, ton ’t spoor hier nog lag, kwam d’r nauweleks volk in dissen hook. ‘n Trein kwam d’r af en too veurbi-j, maor wieter was ’t stille. Net as langs de baeke. Daor kon gin mense kommen, dus was d’r ruumte veur ’t wild umme zich daor terugge te trekken. Noo löp daor ok een pad langs. Prachteg umme te wandeln of te fietsen, maor veur ’t wild wodt ’t allengs moeileker umme zich te verschulen.
In een klein, vol land as Nederland mo’w concessies doon. Wens is “echte natuur”, naost wonnen, ontspannen en recreéren, maor wi-j könt neet àlles hebben. Wild, natuur en de mens mot zich anpassen. Wat dat angeet is de discussie ovver wölve in uns land neet reëel. Dee beesten könt zich nauweleks terugge trekken, mòt haoste wal gewönd raken an verkeer en leu in de buurte, met ne hoop naregheid as gevolg. Wölve, dassen, bevers, ratten…ze bunt ooit bejaagd umdat tevölle daorvan een gevaor wazzen veur dieken, spoorlijnen, volksgezondheid en vee. Dat lig teggenwoordeg geveuleg. Probleem is echter da’w hierovver nauweleks nuchter met mekare könt praoten. Warkbaore oplossingen wodt neet evonne. Bienao elk besluut ovver regulering wodt an-evochten en zo gebeurt d’r niks.
De natuur zelf is hard, ne voggel drukt ‘n jong met weineg aoverlaevingskans oet ’t nust. Daor stao’w wied vanaf, maor beslissingen en dudeleke keuzes, ok at ze zeer doot, bunt soms neudeg um ’t laeven laefbaor te hollen veur alles en iederene. Verkiezingen komt d’r an; oetdagingen genog veur kiezers èn tookomsteg kabinet.
Diana Abbink
___________________________________________________________________
Columns
Maandblad MIJN Magazine heeft columns van verschillende Achterhoekse columnisten. Meer columns? Klik dan op de bijbehorende link! https://www.helemaalachterhoek.nl/category/mijnmagazine/columns/






