Alles begint wier te bleuien en greuien in de natuur. De bloomn staot der mooi bi-j, de boomn hebt wier blaar en de struken doot ok volop met. Jao helaas ok ’t roet begint te greuien en bleuien. Dan mo‛j de tuin in um de boel glad te maken en daor blief i-j dan met gangs tötdat de winter begint.
Al dat onkroed i-j kriegt der ’n puntheufd van. He‛j ut der net allemaole oet-etrokken, ne wekke later steet ut der wier. Waor kump dat roet toch vandan? Weurumme greuit ut zo hard? At de greunte neet wil greuien, ut onkroed schöt, zonder meuite, de loch in. Aoveral staot de brandnettels, muur, zeuvenblad en ander grei, waor as ik de naam gineens van wette. Alle dage bun‛k der drok met. Wal ne veurdeel dat miene kippen dat grei arg lekker vindt. Zee kriegt dan ok altied ut roet in de kipperenne en neet völle later is dat ongewenste spul verdwenen.
Noe dach ik: al dat onkroed, messchien kan ik daor is nen maoltied met maken. Ik wet da‛j bijvoorbeeld brandnettels könt etten, maor hoo maak i-j dat dan klaor? Ik ut internet op, recepten zeuken veur miene onderneming. Daor von ik ne mooi recept veur brandnettelsoep met zuring, zeuvenblad en nog ander roet. Noh ja, dizze leu op internet neumen ut “wildegroentensoep”, bliekbaor is al dat roet, wilde greunte en ik wus gaar neet da‛j zeuvenblad konn etten. Ik de tuin in en al dat roet eplukt en in de soep edaon, want : “If you can‛t beat it, eat it!”
Ut smaken bes, ik dach dat gao‛k vaker doon. Zo he‛k ok nen mooi recept evonn veur hondepol (de peerdeblome). Wis i-j da‛j den helemaol könt etten, van de blome töt de wortel? Zo he‛k van de bloomn ne soort jam emaakt, vrogger neumen ze dizze jam “armeleu‛s honning”. De blaar van de peerdeblome gebruuk ik in miene salades. Van de wortel ku‛j thee zetten, maor dat he‛k nog nooit edaon. Dat lik mi-j neet lekker.
Eigenlijk besteet der helemaol gin onkroed. Roet bunt gewoon plantjes dee‛t de leu neet in de tuin wilt hebben. Dee‛t ze neet zelf eplant of ezaeit hebt. Zo steet der alle jaoren in ut veurjaor de greunte “winterpostelein”. Das hartstikke lekker. In de supermarkt ku‛j dizze greunte neet kriegen en bi-j de greunteboer is ut neet te betaaln. Jao, ut steet ook gewoon in de gemeenteplansoentjes, gratis en veur niks. I-j hooft ut allene maor te plukken. Dan alle greunte dee‛t tusken de stoeptegels staot. A‛j daor aover nao gaot denken, hoo‛j jao gaar neet meer noar de winkel hen, want de greunte greuit gewoon onder oen neus.
Annemarie Damveld
___________________________________________________________________
Columns
Maandblad MIJN Magazine heeft columns van verschillende Achterhoekse columnisten. Ook meer columns? Klik dan op de bijbehorende link! https://www.helemaalachterhoek.nl/category/mijnmagazine/columns/
