Zommer is de tied van de volks- of buurt feest –en en karmissen, Old en jong kiekt der vake al ne helen zet naor oet, los gaon in de feesttente, olde bekenden weerzeen, weineg wieze woorden spraeken en efkes alle zorgen vergaeten, dat bunt mooie aspecten van ’t buurtfeest.
Vergaet ok neet ’t sociale aspect van met mekare ’t feestterrein opbouwen, ne wagen versieren en daor pakkende sprökken veur bedenken. Ton unze kindere nog klein wazzen wodden de optochtwagentjes van de kindere nog helemaol beplakt met pröpkes crêpepapeer. Waekenlang zatte wi-j ’s aovend bi-j de televisie pröpkes te maken. Met de buurleu wisselne wi-j de kleuren onder mekare oet. Den enen had nog ne bak met rooie en blauwe pröpkes aover en ne andern kon unze greunen good gebroeken. Dat monnikkenwark doot ze no gelukkeg neet meer. Maor der wodt nog altied met enthousiasme wagens versiert en met-edaone an de optocht, regelmaoteg doot der meer leu met an de optocht dan dat der publiek an de kante steet um te kieken, maor dat mag de pret neet drukken.
Könning scheten
Hoogtepunt is altied ’t könning scheten. Met ’n geweer scheten op ne holten voggel den good met ne pinne vaste maakt is op ne lange voggelstange. Soms duurt ’t lange, ne andere kere geet ’t gauw, maor de schutter den ’t leste stuksken van de stange schöt mag zich een jaor lang könning van de buurtschap neumen en is ook de rest van ‘n dag ’t middelpunt van ’t feest. ’t Opvolgende jaor trekt de optocht en alle publiek dan naor ’t hoes van de könning um ‘m “oet te halen”, Een feest op zich, waornao ’t hele spektakel zich rond de meddag weer naor ’t feestterrein verplaatst um ne ni-jen “könning te scheten”.
Nao zonnen langen feestdag hebt de meeste leu ook de knollen wal op en stangelt meu maor voldaon met ne helen trop op de fietse op hoes an, dat dat good geet is soms meer geluk as wiesheid. Maor ’n old spraekwoord zeg: “ne zatten boer en een nuchter kalf braekt gin butte”. Gelukkeg geet dat bienao altied nog op.
Diana Abbink
___________________________________________________________________
Columns
Maandblad MIJN Magazine heeft columns van verschillende Achterhoekse columnisten, Ook meer columns? Klik dan op de bijbehorende link! https://www.helemaalachterhoek.nl/category/mijnmagazine/columns/