Potwottels

Dialectkring Achterhoek – Mobielloos tiedpark

Wi-j könt uns ’t dageleks laeven neet meer veurstellen zonder mobiele telefoon. Naost bellen kö’j d’r ok van alles met doon. Eén keer in de waeke krie’j ‘n aoverzicht hoovölle tied da’j actief ewes bunt op dat ding ne dan schrik i-j d’r soms van. I-j könt d’r zelfs verslaafd an raken.

Op schole is ’t gebroek van ’t mobieltjen ’n erkend probleem. Kindere könt zich neet good concentreern, bunt gauw af-eleid of zit d’r tiedens de lesse op te spöllen. De aoverheid wil mobieltjes van de basisscholen weern. Maor van sommege scholen mögt de kindere eur telefoontjen nog wal metbrengen veur at d’r onderweg wat gebeurt, dan könt ze in elk geval naor hoes bellen. Ho dee’w dat toch eerder zonder zon apparaat?

Wi-j wont an ne drokken weg. In ’t mobielloze tiedpark kwam ’t regelmaoteg veur dat d’r leu anbellen. Soms hadden ze autopech, ne lekken fietsenband of de brommer leep neet meer.  Verschillende maolen he’w solutie uut-edeeld of ‘n kenneken met water of benzine. Ok he’w leu wal ‘s naor plaatse van bestemming ebrach umdat eurn auto ’t pertinent leet afweten. Vake belovven ze dan later een bedankjen te kommen brengen en ne heel enkele kere is dat ok echt gebeurd.

Op ‘n maol wodden d’r  midden in de nacht an-ebeld. Nao de eerste schrik blek ‘t ne bekenden veedokter den zonder brandstof ston. Hee mos naor ne boer ‘n endjen wieterop,  of wi-j nog een betken benzine veur ‘m hadden. Dat was gin probleem.

Ne helen zet later kwamme wi-j ’s nachts nao ne visite töt de ontdekking dat d’r ne koo mos bevallen en dat dat neet vanzelf wol lukken. Nao ’n telefoontjen kwam al rap ‘n veedokter um ne keizersnee te doon. Maor hee foetern wal: “dee rotboern gaot eerst en helen aovend naor de visite,  komt dan pas töt de ontdekking dat d’r ne koo melk mot wodden en belt dan midden in ’n nach.” “Ach jao” was miene reactie, “D’r bunt ok veedokters dee vergaet te tanken en uns dan midden in ’n nach oet bedde belt”. Daor had e effen neet meer an edach. Wi-j hebt d’r nog vake um elachen.

Diana Abbink

___________________________________________________________________

Columns

Maandblad MIJN Magazine heeft columns van verschillende Achterhoekse columnisten. Ook meer columns? Klik dan op de bijbehorende link! https://www.helemaalachterhoek.nl/category/mijnmagazine/columns/

Verder lezen

Geef een reactie

Het e-mailadres wordt niet gepubliceerd. Vereiste velden zijn gemarkeerd met *