Elken dag as ’t dreug weer is, gao‛k hen wandeln. Lekker oetwaaien langes de Slinge. Kuiern langes de binnenweggetjes. En dan kom ik geregeld leu tegen, dee‛t net as ik, an‛t wandeln of an‛t fietsen bunt. Wat mi-j dan opvalt is: zee draegt allemaole nen koptelefoon op de kop of eurkes in de oorn!
Van de jonge leu begriep ik dat wal, dat dee‛k zelf vrogger ok, maor oldere leu? Waor luustert dee toch allemaole naor? Waorumme luustert zee neet naor de vöggelkes dee‛t zingt of de wind dee‛t blös? Waorumme loopt of fiets ze allemaole met nen koptelefoon op of eurkes in de oorn? Doo‛t ze met an zo‛n app, um gezonder te wodn of luustert ze naor nen luusterbook of nen podcast? Of loopt ze nen route den eur in-efluusterd wodt? Zelfs leu dee‛t met mekare loopt, hebt beide nen koptelefoon op. Zo ku‛j toch neet met mekare kuiern? Das toch neet gezellig?
Zelf wandeln ik altied zonder koptelefoon, ik wol geerne de geluudn um mi-j hen heuren. Zoas ’t ruusken van ’t water en ’t norkn van de kikvors. Töt op den dag, dat ik naor nen luusterbook an‛t luustern was. Ik dache: a‛k gao wandeln, dan nem ik mien luusterbook met. Dus daor leep ik dan, net as ’t andere volk, met miene eurkes in de oorn. Luustern naor nen spannend verhaal. Ik leep mien gewone rondjen en kwam onderwegns völle wandelaars en fietsers teegn. Wi-j begroeten mekare, zoas altied. Sommige leu zeiden nog meer as allene gedag, maor wat ze zeiden, dat he‛k neet eheurd. Ik lachen dan maor vrendelijk en knikken van jao.
At der nen auto an kwam veurn, dan heuren ik dat wal. Ik von dat trouwens onmeundig steurnd, die auto‛s. Ik kon dan neet mien verhaal good verstaon van al dat lawaai. Toch is ’t neet zonder gevaor, want met aoverstekken van nen weg, kwam ik zowat onder zo nen auto. Den had ik neet eheurd, want ’t was nen elektischen. Dee maakt neet zovölle geluud en mien verhaal was ok alderbarstns spannend. Dan let ie toch minder op ’t verkeer.
Jao, wi-j meugt in de auto en op de fietse neet meer met ons mobieltjen knooin. Dat is gevaorlijk. Maor a‛j loopt met oen mobieltjen in de handn, is dat ok neet altied veilig. Zo mos ik nen maol, nen ni-j verhaal opzeuken op Youtube. Ik leep dus te koekeloern op mien telefoon en kwam zowat onder nen fietse terechte, ik schrok mi-j lam. Ik had um neet ezene en ok neet eheurd, want ik had mien koptelefoon op. Zo zee‛j maor wier, ok a‛j gaot lopen, ku‛j better neet op oen mobieltjen knooin.
Annemarie Damveld
___________________________________________________________________
Columns
Maandblad MIJN Magazine heeft columns van verschillende Achterhoekse columnisten. Meer columns? Klik dan op de bijbehorende link! https://www.helemaalachterhoek.nl/category/mijnmagazine/columns/
