Veur de cursus Achterhook(s) wa’w een paar waeke gelaene met de groep in Almen. In de passende entourage van museum Staal ging ‘t aover A.C.W. Staring, dichter en land- heer op landgood de Wilden- borch. Hee was daornaost ok land- en waterbouwkundegen.
’t Was ne wiezen man den veur dee tied ni-jmoodse ideeën had aover ‘t waterbeheer van zien landgood.’t Kosten ‘m oorspronkelek wat teggenstand, maor oetendeleke wazzen ze ‘m dankbaor dat e met ’t gra- ven van kanalen en baeken maken dat boeren en börgers rondumme de Wildenborch dreuge veute helen.
In de volgende lesse kwammen natuur en landschap van ‘n Achterhook an bod. Op heugtekaarten ko’j zeen welke spaoren de leste iestied hef nao-elaoten en ok precies waor de lege gronden wazzen waor de oorspronkeleke baek- en rivierlopen hen gingen. Wi-j leern aover de plannen van ’t Waterschap Rien en Iessel umme water langer vaste te hollen, net ’t umge- keerde dus van wat Staring indertied neudeg von.
Inzichten en umstandegheden veranderd. Naodat de baeken in de jaoren zöv venteg allemaol ekanaliseerd bunt, mot ze noo juust weer meandern en euren oor- spronkeleken, natuurleken loop terugge kriegen. Dat kost grond, en daorveur is natuurlek völle aoverleg met boeren, landeigenaren en börgers neudeg, dee net as vrogger ok noo wal kritisch bunt. Maor met dudeleke uutleg, een passende vergoeding en zonder dwang is der völle meugelek en ok wal bereidheid um deran met te warken , aldus ’t waterchap. Wi-j kregen prachtege plaatjes van wat al erealiseerd is te zeen.
Met dat leste in mien heufd heur ik, a’k weer thoes bunne, een debat met Frans Timmermans. Hee löt zien gesprekspartner neet oetpraoten, nömp steureg ’t woord en hee blif der maor op hamern dat ’t allemach- teg slecht geet met de Nederlandse natuur en dat der dus minder vee en boeren mot kommen. ’t Irriteert mi-j mateloos, naoda’w net ezene hebt met hoovölle betrokkenheid kostbaore plannen veur water, natuur en landschap erealiseerd wodt. Waorumme eengaal dat negatieve verhaal? Misschien mos e zich de volgende wieze dichtregels van Staring is in gedachten nemmen: “De rijpe kennis hoort, de onrijpe neemt het woord”.
Diana Abbink
___________________________________________________________________
Columns
Maandblad MIJN Magazine heeft columns van verschillende Achterhoekse columnisten. Meer columns? Klik dan op de bijbehorende link! https://www.helemaalachterhoek.nl/category/mijnmagazine/columns/
