Al een paar jaor he’k neet völle an unzen greuntehof edaone. Ik was ’t een betken zat dat der van alles op-evraeten wodden deur mussen, slakken of ander ongesiefer. Daorbi-j bu’j der ok den helen zommer drok met op momenten dat ’t ow eigelek neet zo good oetkump. In de vakantietied bi-jveurbeeld a’j zelf weg wilt of drok bunt met logees en kleinkindere dee’t vakantie hebt. Dan he’j eigelek gin zin an bonen plukken en greunte inmaken. Veureg jaor ha’k der dus allene maor aerbaezen, aerappel en wat dahlia knollen in epot.
Noo ’t zon mooi veurjaor wodden begon ’t toch weer te kriebelen. Al vrog in februari he’k met hölpe van een kleinzönne de eerdbaezen oet-ezoch en verplant, wat leuk um dat met mekare te doon. Inmiddels he’k ook slaot, stengeln, worteln en prei ezaejd en de beuntjes epot. Al warkend bedenk ik mi-j dat dat zaejen en potten een teken van hoppe is, van vertrouwen dat d’r aover ’n tied e-oogst kan wodden. ’t Deut mi-j denken an een verhaal van Dick ten Hoopen aover een olde vrouwe dee, ondanks dat ze wet dat ’t euren lesten zommer waezen zal, toch wil dat d’r in euren hof van alles ezaejd wodt. Een buurman hölp eur daor met. Veur eur geet ’t laeven ondanks alles deur, zee hölt vertrouwen töt an ’t leste too en geniet ok den lesten zommer van alles wat greujt en bleujt.
Dat verhaal is een mooi symbool. Veur ieder van uns breg ’t laeven mooie en minder mooie dinge, neet alles geet vanzelf. Zo he’k aover ’t algemeen völle schik in mien (vri-jwillegers)wark, maor soms wilt dinge ok wal is neet lukken en dan kan’k beheurlek de pest in hebben. Nao zonne donkere bujje schient echter toch altied wal weer de zunne. En dan opens kump de börgemeister veurrien, steet ’t arf vol bekenden en dierbaoren, heur ik lovende weurde en “Het heeft Zijne Majesteit behaagt….” Wat ne ere en wat ne beloning! Dat göf energie, daor kan’k nog jaoren op teern. ’t Is waorachteg een bi-jzunder mooi veurjaor!
Diana Abbink
___________________________________________________________________
Columns
Maandblad MIJN Magazine heeft columns van verschillende Achterhoekse columnisten. Meer columns? Klik dan op de bijbehorende link! https://www.helemaalachterhoek.nl/category/mijnmagazine/columns/
