Zoeken
effen

Effen wegdreumen….

Op zeuk naor ‘n woord veur de waekelekse Dialectquiz op RTV Slingeland blader ik deur “Het dialect van Winterswijk” van G.H. Deunk en dr. H Entjes. ’t Is ’n oetgave van 1971 en dus al meer dan 50 jaor old. D’r staot völle oetdrukkingen in dee nog altied gebroekt wodt, maor d’r bunt ok woorden dee’k neet kenne of dee’k mi-j noo’k ze laeze weer herinnere van opa en oma.

Zo loop ik teggen ’t woord karkenende an. Betekenis: de mooiste kante van de akker. De kante waor karkgangers langs komt en waor dus wat extra zorg an bestaed wodden umme good veur ’n dag te kommen. D’r steet ok een veurbeeld in zinsverband bi-j: “Jao, dee kante zuut d’r wal hups mooi oet, maor dat zal dan ok wal ’t karkenende wezzen.” Heerlek metene de suggestie d’r bi-j dat ’t d’r bi-j den boer wal neet aoveral zo glad bi-j zal liggen. Elkene kent zich zelf.

Ander mooi naoslagwark bunt de WALD woordenbeuke. A’k daor wat deur rondstruine kom ik op Sunt Steffen, 26 december. Veur zo’n honderd jaor gingen jonge leu met een gewoon boerenpeerd van ’t ene café naor ’t andere. ’t Angename wodden dan met ’t nuttege combineerd, want ’t was de bedoeling um de warkpeerde, dee met de feestdage neet warken, luk bewaeging te gevven. Later wazzen d’r in ’n Achterhook verschillende ri-jverenegingen dee een Sint Steffenrit organiseerden op tweeden Kasdag.

De waeke tussen Kasmissen en Ni-jjaor neumen ze de spinnewaeke. Boerendochters gingen dan um beurten bi-j mekare op visite umme samen te spinnen. Geleuf maor dat d’r dan heel wat af-ekwebbeld wodden. ’t Wazzen vast gezellege aovende bi-j de kachel a’j boeten neet völle konnen beginnen.

Op oldejaorsaovend wodden egaeten van al ’t geslachte, zovölle a’j maor konnen. Of d’r wodden ’n helen aovend ekaart. ’t Olde jaor oet en ’t ni-je jaor in. Veurwark was d’r nog neet, d’r wodden eschotten met carbid of deur de kindere met ne slöttel of later met ne knepperkespistolle.

Bladerend deur de woordenbeuke krie’j een mooi beeld van hoo ’t laeven zo’n honderd jaor gelaene ongeveer was. Eén ding is onveranderd, wi-j wenst mekare nog altied völle Heil en Zegen veur ’t ni-je jaor.

Diana Abbink

___________________________________________________________________

Columns

Maandblad MIJN Magazine heeft columns van verschillende Achterhoekse columnisten. Meer columns? Klik dan op de bijbehorende link! https://www.helemaalachterhoek.nl/category/mijnmagazine/columns/

Verder lezen