At ieleu dit stuksken laest is 2024 alweer een dag of tiene old. De feestdage en ‘t Ni-jjaorwinnen bunt veurbi-j. Maor niks steet mi-j in de waege umme alle laezers ’t allerbeste te wensen veur ’t ni-je jaor, dat ’t owleu good mag gaon!
Maor wat is good? Wanneer is ’t good? Een onderzeuk van de Rabobanke göf an dat unze economie wal greujt, maor da’w in Nederland neet welvarender bunt ewodden. Hoo kan dat? Um dee welvarendheid te maeten wodt naor 11 parameters ekekken, waoronder inkommen, huusvesting, gezondheid, persoonleke ontwikkeling en ok maatschappeleke betrokkenheid en sociale contacten. A’j dan naor ’t landkaartjen kiekt waor de maote van welvaart is in-ekleurd dan bunt de grote staeden in ’t westen ’t minst welvarend, maor zitte wi-j in Gelderland en zeker ok in de Achterhook good. Neet umda’w de hoogste inkommens hebt, maor juust vanwaege dat sociaal-maatschappelijke aspect: laevensruumte, naoberschap, verenegingslaeven, gemeudelekheid en ummezeen naor mekare. Dat leste mo’w trouwens zorgvuldeg bewaken, anders glipt ’t uns in de raozeri-je van alledag ok tussen de vingers hen. Unze regio kent nog völle tradities: paosveur bouwen, meiboom zetten, kraomschudden, mooimaken en hoge laeven op de broedlachte, carbid scheten en ni-jjaorwinnen. ’t Mooie an disse tradities is da’j ze met mekare doot en schik hebt met mekare. Allene al daorumme bunt ze ’t bewaarn weerd, nog los van ’t feit dat ze cultureel arfgood bunt. Maor i-j könt natuurlek ok ni-je tradities bedenken.
Good inkommen
Geregeld mo’k nog denken an unzen olden smid. Hard warken, tenminste 6 dage in de waeke. Een good inkommen, maor toch sober laeven, gin luxe hoes of auto. Maor at der ‘n feestjen was, dan deet-e geerne met en genoot met ‘n borreltjen in de hand van alle gezellegheid um ‘m hen. ’t Kwam ‘m allemaole neet anwaaien, maor toch was e ‘n tevraene man.” I-j könt tenslotte toch neet meer dan ene karbonade daags aeten” zae-t-e dan.
Dee nuchtere, relativerende holding is in disse ingewikkelde tied neet verkeerd. Minder klagen, wat minder materialistisch wezzen, maor wal genieten van de mooie dinge dee der bunt. Misschien wal ’t allerbeste wa’k ow too kan wensen.
Diana Abbink
___________________________________________________________________
Columns
Maandblad MIJN Magazine heeft columns van verschillende Achterhoekse columnisten. Meer columns? Klik dan op de bijbehorende link! https://www.helemaalachterhoek.nl/category/mijnmagazine/columns/
