Herinneringen

Herinneringen maken

Een mense herinnert zich an ’t ende van zien laeven vake de mooie, kleine dinge dee-t e hef met-emaakt. Dat laes ik regelmaoteg in interviews, onder andere met leu dee 100 jaor bunt ewodden of zorgverleners in een hospice.

Bi-j ’t terugge kieken geet ’t nooit zozeer ov ver o’j oew wark altied wal good edaone hebt of dat oewe ramen wal op tied ezeemd waan, maor meer ov ver den arm um oewe scholder too’j dat zo neudeg hadden of dat ene bi-jzundere feest wao’j zo van genoten hebt.

Ok BN-ers hebt ’t d’r regelmaoteg aover dat mooie herinneringen maken belangrieker is as succes en glamour. Meestal dan wal in combinatie met ’t plan umme völle en wied weg te gaon reizen, of regelmaoteg lange weekenden naor London of Paries. I-j könt dus van ’n trend spraeken, en in dit geval neet helemaol ne verkeerden vin ik. Al he’w in unzen mooien Achterhook misschien wat minder behoefte umme heel vake wied op reize te gaon

Vakanties waan veur uns met de boerderieje sowieso neet zo vanzelfspraekend. ’t Was altied völle geregel umme d’r ne waeke tussen uut te gaon. D’r mos bedrijfshulp kommen um ’t vee te verzorgen en te melken, en ok ’s nachts mos d’r altied iemand waezen veur ’t geval d’r ne koo melk wodden of zo. Veurda’w weg konnen makene wi-j dus ’n heel draejbook met anwiezingen en veur de nachteleke oppas wo’j ok ’t hoes wal an kant hebben. En dan ha’w ’t nog neet aover ’t koffers pakken en veur de kindere niks vergaeten. Eerlek gezegd he’k wal ‘s edach bi-j mi-jzelf “wat hale wi-j uns op ’n hals, kö’w neet baeter gewoon thoes blieven? ”. Maor achteraf blek ’t altied de möjte weerd en bun’k bliej da’w dee kostbaore tied met unze kindere enommen hebt.

Inmiddels mö’w genieten van kleinkindere en dee vult de veurraod met ook mooie herinneringen steureg an. “Opa, dat is ’t vriendje van oma” is ne opmarking dee’w koestert en wi-j hopt dat d’r nog heel völle komt. Mooie herinneringen, neet persé groots, maor zo weerdevol. Ik gön ze iederene, alle dage.

Diana Abbink

___________________________________________________________________

Columns

Maandblad MIJN Magazine heeft columns van verschillende Achterhoekse columnisten. Meer columns? Klik dan op de bijbehorende link! https://www.helemaalachterhoek.nl/category/mijnmagazine/columns/

Verder lezen

Opgelucht
Bedrijfspresentaties
Financiën

Opgelucht…

Elke dag verlaten cliënten opgelucht ons kantoor nadat ze hun testament hebben geregeld. Een testament lijkt iets definitiefs, maar het is eigenlijk een momentopname. Het is gebaseerd op iemands wensen

Geef een reactie

Het e-mailadres wordt niet gepubliceerd. Vereiste velden zijn gemarkeerd met *