Op schole leerne wi-j dat ’t huwelek d’n hooksteen van de samenlaeving is. Daor is völle veur te zeggen. Onderzeuken hebt an-eteund dat gezinnen waor vader en moder beide anwezeg bunt ’n belangrieke basis bunt veur ’t veileg opgreujen van kindere. Daorbi-j hebt complete gezinnen ’t financieel vake wat baeter en hooft ze minder vake professionele zorg an te spraeken umdat ze veur mekare könt zorgen. Helaas stig ’t antal echtscheidingen of verbrokken partnerschappen al jaoren.
Hoo dat kump? Daor bunt onderzeuken naor edaone. Leu hebt allerhande raedenen um ’t nus ondern boom te laoten vallen. “Maor neet te onderschatten bunt onrealistische huweleksverwachtingen” aldus de conclusie van een onderzeuksbureau. Noo gleuf ik best dat de verwachtingen deur mooie plaatjes van romantische huweleksvoltrekkingen in Toscane of an één of ander zunneg strand, hoge op-eschroeft bunt. Natuurlek mot de huweleksreize daornao ok lange en veural wied weg waen. Wi-j wilt alles teggenwoordeg perfect hebben, könt neet good meer met teggenslage umme gaon liekt ’t wal.
Hoo was dat indertied dan bi-j unszelf? De keuze um te trouwen was denk ik meer vanzelfspraekend, ’t ging naor veurbeeld van olders, familie en kammeräö. Mooi, maor kwa organisatie allemaol luk minder hoogdravend geleuf ik. Dat passen misschien ok neet zo good bi-j uns oosterlingen. Aover geveulens praoten vinne wi-j moeilek, dat losse wi-j vake op met humor, gekheid of bedekte oetspraken. Zoas bi-j de felicitaties an een zilveren broedspaar ton één van de gasten zae “gefeliciteerd da’ j ’t zo lange vol-ehollen hebt”, waorop d’n brudegom met ’n knipeuge antwoorden “Jao, ik hoppe da’w ’t slimste no wal ehad hebt”.
In de streektaal is “ik holle van ow” van oldsheer ok neet zo’n gebrukeleke oetspraak. Ontroerend dan weer wal de oetspraak van ne rouwenden weduwnaar aover ’t verlees van ziene vrouwe: “Heel arg jommer, want ze leep mi-j joo nog niks in de waege”.
Onlangs mogge wi-j unzen trouwdag weer belaeven. Met gezonde kindere en kleinkindere raeden veur grote dankbaorheid. Maor oeps… de brudegom was ‘m vergaeten, schoonheidsfoutjen. Wi-j hebt d’r umme lachen en d’r daonao ne mooien dag van emaakt.
Diana Abbink
___________________________________________________________________
Columns
Maandblad MIJN Magazine heeft columns van verschillende Achterhoekse columnisten. Meer columns? Klik dan op de bijbehorende link! https://www.helemaalachterhoek.nl/category/mijnmagazine/columns/
