Onlangs was ik te gast bi-j de Vrouwen van Nu in Neede. Ne zale vol enthousiaste vrouwleu dee geïnteresseerd luustern naor mien verhaal en metdeen an de pubquiz. De vrouwenvereniging geet mi-j an ’t harte, ik bun der al bienao 40 jaor lid van en heb der völle eleerd. Teggen de tendens in is de Needse afdeling nog springlaevend, maor der bunt ok völle afdelingen op-ehollen te bestaon. Hoo spieteg ok, eigelek kö’j zeggen dat wat ooit de grootste vrouwenvereniging van uns land was, noo op de leste bene löp.
De vereneging is in 1930 op-ericht as Nederlandse Bond van Boerinnen en andere Plattelandsvrouwen. Dit in naovolging van de Nederlandse Vereniging van Huisvrouwen. Doel van de verenigingen was, naost ontmoeting en gezelligheid, o.a. bevordering van algemene ontwikkeling, baeter onderwies (met name op ’t platteland), meer betrokkenheid bi-j maatschappeleke ontwikkelingen en actieve deelname van vrouwen an de politiek en betaald wark.
Wazzen de oprichters van de vereneging veural echtgenoten van de notabelen, al gauw slotten zich vrouwleu van verschillende achtergronden an en natuurlek ok völle boerinnen. In de beginjaoren was ‘t trouwens helemaaol neet vanzelfspraekend dat vrouwleu van hoes gingen veur ’n vergadering of ne laezing. ’t Kon eigelek neet da’j maor zo op ’n deurdewaekse dag ’t wark thoes leten liggen. Ton mien oma net nao’n oorlog lid wodden, kwam der in de buurte praot van dat ze weer ‘s naor darp fietsen um naor ne samenkomst van de ‘boerinnenbond’ te gaon. Een betken schamper wodden ’t ok wal de ‘platte wieve’ eneumd.
De Plattelandsvrouwen, vanaf 2012 Vrouwen van Nu, hebt deur de jaoren hen succesvolle projecten op-ezet, de vereneging genoot respect en anzeen. De glasbak, kinderopvang, gezinshulp en acties teggen voedselverspilling bunt veurbeelden van inititatieven. Op ’t hoogtepunt in de jaoren neggenteg tellen de ‘Bond’ landelek 80.000 leden. Daormet leggen ze beheurlek gewicht in de schale at ’t um maatschappeleke invloed ging.
Net as völle verenegingen hebt de Vrouwen van Nu ’t moeilijk; weineg anwas, gin bestuursleden meer te kriegen. Jonge vrouwleu bunt an ’t wark, oma’s bunt drok met oppassen. Een fenomeen völt geleidelek an weg, geet misschien wal mede ten onder an eigen succes.
Diana Abbink
___________________________________________________________________
Columns
Maandblad MIJN Magazine heeft columns van verschillende Achterhoekse columnisten. Meer columns? Klik dan op de bijbehorende link! https://www.helemaalachterhoek.nl/category/mijnmagazine/columns/
