Unzen boerenfox was ne bliksem; fel op ongedierte en ok de postbode, pakketbezorgers en collectanten dee an de deure kwammen zag e an veur gespuis dat e van ’n plas mos hollen. Van katten mos e ok helemaol niks hebben. At der ne katte bi-j uns kwam anlopen, wodden bi-j de eerste ontmoeting metene dudelek emaakt wee’t der baas was op ‘t arf. Eénmaol had zonne zwarfkatte de euvele mood umme op zolder van de schoppe jongen te kriegen. Nao ne waeke of zesse kwammen de schattege jonge poesjes achter moder an naor boeten, gelukkig was de hond op dat moment binnen. Wi-j hoppen maor dat moder poes zo verstandig was umme ze ‘n betken op afstand te hollen en naor ‘n andere stae te brengen, maor nao ‘n paar dage ging ’t toch mis en kreeg de hond der éne te pakken.
Dat vonne wi-j zieleg, en um ze neet allemaol as éenhapscrackers deur de hond te laoten sneuveln kwam mien schoondochter de leste twee ophalen en nam ze met naor eur hoes um ze daor veileg op te laoten greuien. Voeding gevven lukken wal, maor òpvoeding veel nog best teggen. ’t Wazzen echte wilde boerderi-jkatten en dus hingen ze al schielek in de gedienen. Desondanks moggen ze blieven. Op den duur wodden ze wal zinneger, en nao verloop van tied moggen ze dan ok vri-j loslopen. At ze ’s aovends nog late op pad wazzen konnen ze deur ’t slaopkamerraam dat op ’n kiere ston weer binnen kommen.
Zoo ok in eure huweleksnacht een klein jaor later. Naor good gebroek wazzen de kammeräö tiedens de receptie ’s meddags stiekem naor ‘t hoes van ’t broedspaar egaone. Ze hadden de hele slaopkamer vol estopt met ballonnen. De verrassing was groot ton ’t broedspaar ‘s nachts, nao ‘n mooi feest, thoes kwam. Neet allene deur alle ballonnen, maor ok deurdat de beide katten in eur bedde zatten. Ton dee deur ’t raam naor binnen sprongen knappen natuurlek de ballonnen onder eure peute. Totaal in paniek hadden ze zich bedaone in ’t bedde van ’t broedspaar. Broed en brudegom heeln zich groot maar ik vermoed dat ze zich den huweleksnacht een betken anders veur-esteld hadden.
Diana Abbink
___________________________________________________________________
Columns
Maandblad MIJN Magazine heeft columns van verschillende Achterhoekse columnisten. Meer columns? Klik dan op de bijbehorende link! https://www.helemaalachterhoek.nl/category/mijnmagazine/columns/
