’t Is de tied van ’t jaor wao’j altied verlangend naor oet kiekt, veurjaor, zommer. De beeste loopt inmiddels alweer ne helen zet boeten met natuur.
Onder belangstelling van zowat de hele familie sprongen en stuitern ze den eersten dag de greune weide in. De eerste zwaluwen scheerden der lusteg aoverhen en tussendeur. Bli-j met de modde en de mest dee ze gebroekt um eur nust te metseln. Griepend naor de vleegskes, noodzakelek voedsel. Mooi zoo ‘t in de natuur alles op mekare af-estemd is. Vake blieft zwaluwen weg zo gauw at der gin beeste meer op de boerderi-je bunt, want dan mist ze voedsel en bouwstoffen.
Reizen
Dat is bi-j uns neet ’t geval, op de daele is ’t ne drokten van wonder en geweld. Van de lange reize naor Afrika bunt der geleidelek an ne helen trop weerumme kommen. Dit jaor bunt ze later as veurgaonde jaoren, ’t is nog lange kold ewes, en daor past dee dierkes zich op an. Twee an twee zeukt ze zich ‘n plaatse um te nusseln. Zwaluwen bunt trouw, paartjes blieft zo lange möggelek bi-j mekare.
Een collega boer meldt verdreteg dat e geet stoppen met zien bedrief. Al generaties is ‘t in de familie maor no hölt ’t op te bestaon. Der is eigelek wal ne opvolger, maor den dörft ’t neet an umme der met wieter te gaon. Tevölle regels, tevölle onzekerheid (bun ik misschien ok een piekbelaster?) en weineg waardering veur boeren.
Bi-j dat alles zeg e opens dat ‘t ‘m ok zal spieten at de zwaluwen neet meer komt at de beeste straks weg bunt. He hef altied zo’n plezaer in dee rappe kwetteraars. Jaorenlang hef e ze evolgd, heel e bi-j wanneer ze kwammen en weer weg gingen, spannen een kabel in de stal waor ze op konnen gaon zitten umme oet te rösten of “vergadering te hollen”. Ok gooien e water in de weide at ’t te dreuge was umme modde te vinnen…
De aoverheid wil dat agrariers (nog) meer gaot boeren met natuur, jammer dat ze vanachter ‘t bureau precies ’t umgekeerde stimuleert.
___________________________________________________________________
Columns
Maandblad MIJN Magazine heeft columns van verschillende Achterhoekse columnisten. Meer columns? Klik dan op de bijbehorende link! https://www.helemaalachterhoek.nl/category/mijnmagazine/columns/
