Diana Abbink oet Wenters. Projectleider biej Erfgoedcentrum Achterhoek en Liemers (ECAL) en onder meer veurzitter van de Dialectkring Achterhook en Liemers met laevenskunst. Geboren en getogen in Wenters, boerin, dochter, moeder en oma.
Inens was ze d’r neet meer. Töt ’t ende to bleef ze hoppe hollen dat ze nog effen langer biej uns mog blieven. Helaas is Annemarie Damveld op 26 februari 2023 aoverlaene. Oet de tied ekommene, zo at ze dat zelf zol zeggen. Met eur verleze wi-j een optimistisch en creatief bestuurslid van de Dialectkring Achterhook en Liemers. Daornaost was ze natuurlijk ok columniste van dit blad en hef ze elke maond een verhaaltjen in de streektaal an-eleverd, töt an ’t leste to. Daorbi-j stellen ze zich kwetsbaor op, gaf met eure stukskes ’n inkiek in eur persoonleke laeven en ervaringen. De manaere waorop ze eure zeekte droog mö’j geröst laevenskunst neumen.
No is ‘t an mi-j um ’t stöksken van eur aover te nemmen en maondeleks dissen dialect column te vullen. Ok ik zal schrieven aover dinge dee’k umme mi-j hen zee gebeuren of dee mi-j persoonlek raakt.
Koken
Onlangs zat ik veur warkaoverleg in de grote kökken van Erve Kots in Levelde. Met vief vrouwleu wazze wi-j een programma an ’t bedenken veur kindere, in ’t Achterhooks Openluchtmuseum. Inens zoog d’r ene ne huifkar ankommen.”Kiek toch es, allemaol kleine menskes dee d’r oetkomt” verwondern dee zich. Ni-jschiereg keke wi-j allemaol naor boeten en töt mien verbazing zag ik dat ’t olde leukes wazzen, in optocht met rollators en begeleiders. Daortussen ontdekken ik ok mien moder. Wat een tooval dat ik eur daor trof. Met eure huusgenoten maken ze ‘n uutstapjen en gingen met mekare pannekoke aeten. Ze genoten d’r allemaole zichtbaor van en ze stralen ton ze mi-j zaggen.
Ton ze nog thuus was, maken ze zich zorgen aover van alles en nog wat. A’w op bezeuk kwammen was d’r altied wal een karweitjen wat gebeuren mos. Ne gemenen val maken dat ze op-enommen mos wodden. Neet fijn, maor wat een geluk dat ’t zo kan. Ze is neet meer allene. A’w eur no opzeukt is d’r altied koffie en gezelligheid. Ondanks eure beparkingenen schildert ze, dut aan gymnastiek en bloemschikken. Hulde an de zorgmetwarkers en vri-jwilligers dee de leste laevensfase van mien moder veur eur en veur uns, eure kindere, zo mooi inkleurt. Ok dat is in miene ogen laevenskunst.
___________________________________________________________________
Columns
Maandblad MIJN Magazine heeft columns van verschillende Achterhoekse columnisten. Meer columns? Klik dan op de bijbehorende link! https://www.helemaalachterhoek.nl/category/mijnmagazine/columns/
