Op moment van schrieven geniete wi-j van ne olderwetsen zommer, dat wil zeggen dat ’t hele dage piepestellen raengt. Dat water is good, de afgelopen jaoren wa’w tekort ekommen. Maor alle dage duuster weer is vervelend a’j vakantie wilt hollen. Gelukkig is de Zwarte Cross neet helemaol in ’t water evolne. De stemming was best en wi-j hebt völle volk in de tente ‘had dat metdee an de Achterhookse pubquiz. Dee leu bunt no allemaole weer ambassadeurs veur ’t Achterhooks.
Bi-j ’t oprumen – want wat mo’j anders met zo’n weer – von ik een book met Achterhookse, streekeigen en vake al vergaeten volksverhalen. De meesten bunt um te griezelen en te growwelen, prima vertelstof veur ne somberen zommeraovend. Laes dissen maor ‘s:
Mölle
Op ne mölle bi-j Silvolde kwam ne ni-jen möldersknech. Den olden knech veurspellen ‘m dat e daor wal neet lange zol blieven. “Ut zal mi-j is beni-jen of i-j ‘t daor lange volholdt”. Maor de knech was neet bange. Den aersten den besten nach, ton e drok an ‘t malen was, kwam der ne katte bi-j ‘m. De knech nam ne maalzak en flaern d’r de katte met umme de kop. De katte begon opins te praoten en zae: “At straks ‘t olde griesken maor is kump, dee zal ow wal”. Den knech maken zich hellig en nam zien mes, heeuw der met van zich af en sloog de katte ne poot af.
De katte schreeuwen en vloog weg. Den poot stok de knech in ziene tesse. Den andern morgen ton e op ‘t möldershoes kwam, lag de grotmoder in bedde. Ton e vroog wat of eur faelen, zae-n ze dat ze zich slim in de hand esnaene had. Ne vinger der knats af. Ton gaf de knech den poot an de mölder, want ‘t was de grotmoder ewes, dee ‘snachs bi-j ‘m op de mölle was ekomm’ne. *
Töt slot ne Achterhookse wiesheid, passend bi-j ‘t weer: ne boer past ’t van alle kanten, raengt ’t in ’t heui, dan wast de planten.
*) Bron: De oele röp – Achterhookse Volksverhalen , samengesteld door Henk Krosenbrink (1968)
Geïnteresseerd in onze streektaal of wil je meer weten over de Dialectkring? Bezoek dan gerust eens hun website Dialectkring.nl
Wil je meer gepubliceerde stukken bekijken? Lees dan ook zeker de columns nog eens digitaal terug!
