Mien laeven kent een antal vaste ritmes. Elke maond mot d’r ne column veur Mijn uut de penne kommen. Alle veertien dage verzorg ik een radio-uutzending, een praotprogramma met interessante gasten dee wal op tied uut-eneudegd mot wodden.
Elke dree maond mot d’r een woordzeuker en een artikeltjen emaakt wodden veur de Moespot, ’t ledenblad van de Dialectkringen. En tenslotte mot d’r ok elke maond weer een antal tv-opnames emaakt wodden veur de waekelijkse dialectquiz op RT V Slingeland. De agenda mot dus strak bi-j ehollen wodden.
Of ’t kump deur dee regelmaoteg teruggekommende activiteiten wet ik neet, maor de tied vlug veurbi-j. Zo stao’j opnames te maken bi-j d’n Kasboom en dan loop i-j alweer lekker in ’t zunneken tussen de crocussen en de paosblomen. Dee dialectquiz op de tillevisie mek trouwens een hoop los. ’t Is heel bi jzunder hoovölle reacties a’w door op kriegt.
Onlangs was d’r een foutjen emaakt bi-j de opnames. Normaal gev ve wi-j elke waeke eerst de oplossing van de veurege kere en dan stelle wi-j de ni-je vraoge. Maor disse kere was d’r in de uutzending gin oplossing op-enommen. Metene d’n volgenden dag kwammen d’r al mailtjes binnen da’w wat vergaeten wazzen. En ton ik ’s meddags met mien moder in ’t restaurant van ‘t verzorgingshuus kwam ston d’r een man op uut een gezelschap dat daor zat. “Hee daor is ze…. I-j bunt gistern vergaeten de oplossing van veurege waeke te gev ven”. “Dat was een test um te kieken of ieleu wal oplet ” reageerden ik maor gauw. “Jao dat zal wal” lachen ’t gezelschap d’r aoverhen. Kiek dat is wat streektaal dut. ’t Is altied gemeudelijk, ’t warkt verbindend en ’t is een dankbaor gespreksonderwarp. Want bi-j uns zegt ze grös en in Aalten zegt ze gres. En in Wenters bunt de geuren an ’t bozzen en in Beltrum maakt de weulen heupe in de weide.
Wee daor meer van wil weten kan metdoon an de cursus Achterhook(s), den geet 9 april weer van start. Anmelden geet misschien nog via info@ecal.nu Dan he’k d’r weer een ritme bi-j: zes keer aover elke veertien dage ne cursusaovend, ik kiek d’r naor uut!
Diana Abbink
___________________________________________________________________
Columns
Maandblad MIJN Magazine heeft columns van verschillende Achterhoekse columnisten. Meer columns? Klik dan op de bijbehorende link! https://www.helemaalachterhoek.nl/category/mijnmagazine/columns/
