Wet i-j nog van de grote trouweri-jen en broedlachten in de 70-er jaoren? In dee tied hebbe wi-j ok de grote stap ewaogd. Veur ’t trouwen samenwonnen (hokken neumen ze dat) heurn d’r nog neet bi-j. Töt ‘n lesten dag wa’w drok met de verbouwing en inrichting van ’t hoes; wi-j hadden uns bi-j de planning iets verkekken op de tied dee dat kosten. ’s Aovends veur ‘n groten dag ha’w net de leste klusjes klaor ton de buurte met ne boggen kwam. Niks op tied naor bedde en veurbereiden op ’t feest, den boggen mos eerst nog nat emaakt wodden.
Grote feesten wann toodertied heel gewoon. De hele familie, oppa’s, omma’s, ooms, tantes, naeven, nichten, kammeräo, de buurte, collega’s van ’t wark en leden van de sportverenigingen wao’w bi-j wazzen, alles heuren der bi-j. Der wodden ‘n helen aovend edanst, daor wa’j tenslotte veur naor de danslesse ‘wes. De muziek begon meestal rusteg met kwikstep en Engelse wals. At der völle oldere gasten waan, dan wollen ze ok nog wal is ne Valeta of ne Drikusman spöllen en veur de kindere de Zevensprong.
Halverwaege ‘n aovend, naodat menneg sketchen was op-evoerd um ’t broedspaar in ’t zunneken te zetten, kwam de bruidswals. ’t Broedspaar wodden in-ewikkeld met serpentines en daornao wodden d’r ‘n paar steule van achtern ehaald dee speciaal klaor ezat wazzen veur ’t hoge laeven. Starke kaerls streupen zich de mouwen op en beurn broed en brudegom aover de dansvloere terwiel at iederene zong ”De brudegom den wög ziene vrouwe neet te kussen”. At dat nao ne wiele toch elukt was begon ’t ruigere deel van ’t feest. De obers hadden inmiddels zovölle drank rond ebrach dat iederene daor good veur in de stemming was.
Onlangs ha’w ‘n modern trouwmaol. Een stralend broedspaar, de gasten bienao allemaol jonge leu. Gin zitplaatsen maor staotaofels, muziek van een discjockey en drankjes en hapjes dee’j zelf konnen halen. Gin sketches, gin hoge laeven, maor Inwikkeln in serpentines deen ze nog wal. Opens realiseern ik mi-j da’w inmiddels bi-j de olde leu heurt. Um dat nog effen te ontkennen he’k dapper met ehupst op de discomuziek en met-edaone an de polonaise.
Diana Abbink
___________________________________________________________________
Columns
Maandblad MIJN Magazine heeft columns van verschillende Achterhoekse columnisten. Meer columns? Klik dan op de bijbehorende link! https://www.helemaalachterhoek.nl/category/mijnmagazine/columns/
