Endeluks was ut zowiet. Ut was prachtig weer, de zunne scheen, de raegen was vot. Mien va en mo kwamen um kwart aover zes bi-j ons en miene zönne oet ut westen was ’s middags al ekommen.
Um kwart veur zeuven bu‛w met mekare in de auto estapt en dat naor Marveld hen in Grolle. Noe denkt uleu natuurlijk da‛w daor op vakantie bunt egaon, in nen huusken. Noh dan denkt uleu dat mis. Wi-j bunt den aovend in nen löchtballon egaon. Den hebt ze op-eloaten op nen grasveld op de camping. Wat nen groot ding was dat zeg. A‛j ze in de loch zeet, liekt ze altied heel klaen, maor an de grond… en dan den maand deronder, daor konn negen leu in. Wi-j waren met zien zeuvenen.
De löchtballon ston al rap klaor en neet völle later vertrokken wi-j richting Zwolle achter Grolle. De weend kwam oet ut oosten, dus dan gao‛j richting Duutsland. Wi-j kekken onze oogn oet, wat is ut landschop vanoet de loch toch mooi. Aoveral zee‛j verschillende kleuren greun en gel. Beume en weilanden, met hier en daor ne boerderieje. Völle ruumte en natuur, aoveral lepen de hazen veur ons vot en de hunden maor blekken.
Nao nen zetjen varen kwamen wi-j aover ’n paol. Mien mo von ut daor neet zo mooi as in de Achterhook. De kleuren greun zagen der heel aans oet, völle bleker. Dat kwam umdat ut gin grös was, maor gewassen, zoas graon. Wi-j bunt toen richting Stadtlohn evaren. Daor wol de piloot wal argens de ballon wier an de grond brengen, maor dat lukken neet. Aoveral waor nen plek was, daor verbouwn ze gewassen, jao en daor goa‛j neet in landen. Dus mossen wi-j aover Stadtlohn hen varen. Wi-j kieken naor nen goeien plek en daor helemaol achteran, jao, daor zagen wi-j nen stuk grösland. Daor hef de piloot heel netjes de ballon an de grond ebrach.
Naodat wi-j de ballon op-eruumt hebt met mekare, kregen wi-j ne ceremonie. Eerst verteln de piloot nen verhaal aover de allereerste ballonvaart in Frankriek. Daornao hebt ze ons edoopt met grös en champagne. Wi-j kregen nen oorkonde van de reis den wi-j emaakt hebt. Jao, leu ik bun noe Barones van Grolle töt Stadtlohn, ik bun in de loch-adel op-enommen, tis toch wat.
Annemarie Damveld
___________________________________________________________________
Columns
Maandblad MIJN Magazine heeft columns van verschillende Achterhoekse columnisten. Ook meer columns? Klik dan op de bijbehorende link! https://www.helemaalachterhoek.nl/category/mijnmagazine/columns/
