Jao leu, ik zit de helen dag op nen stool naor boeten te kieken. Ik vermaak miej der bes met, want de vöggelkes komt völle in mien hof. Zee et dan van alle lekkers dat mien man in de gaorden eplaats hef.
Zo komt der alle dage biejmezen en geetlinken en ne roodbörsken. Ok de muskes bunt met völle anwezig. Die maakt altied ruzie met mekare om et etten. Dan kibbelt ze en vleegt ze makere an. Mooi um te zeen. Mangs hebt ze ok nen vergadering met mekare in de boom. Dan gaot ze toch tekeer, wat ne drökte.
Wiej hebt de zaodpot altied rap wier leug. Mangs wal is in één dag. Dan bunt ze allemaole zo gulzig an et snopen ewest, dan mo‛j de boel wier biejvullen. Ok de vetballen gaot der rap deur. De muskes zit der altied met wal viefe tegelieke op zo nen vetbal.
Noe hebt wiej ok nen reuver in et hof. Nen dikke zwatte katte, den probeert de vöggelkes te vangen en op te etten. As de katte in de tuin zit, bunt der gin vöggelkes in de tuin, die kent de reuver dus al. Miene katten vindt den reuver ok niks, at hee in de tuin zit, dan gaot ze toch tekeer met mekaar, dan wilt ze de zwatte katte wal an vlegen, maor helaas veur de dames, der zit nog ne roete tussen en de zwatte katte trekt zik der niks van an.
In januari doo‛k altied met an de nationale vöggelkestelling van de vogelbescherming. Das mooi makkelijk a‛j ze voert. Ie möt dan ’n half uurken tellen, maor jao, as ik dat gao doon, dan bunt der gin vöggelkes in mien hof. Net of ze wet da‛k ze gao tellen. Deurumme schrief ik ze altied al eerder op, dan wet ze neet da‛k ze eteld heb.
Jao leu, zo vermaak ik miej, noe da‛k zeek bun. Ik hoppe wal dat ik straks toch nog wier kan lopen en fietsen. Dan kan ik voer kopen veur de vöggelkes en dit zelf wier ophangen in et hof.
Annemarie Damveld
___________________________________________________________________
Columns
Maandblad MIJN Magazine heeft columns van verschillende Achterhoekse columnisten. Meer columns? Klik dan op de bijbehorende link! https://www.helemaalachterhoek.nl/category/mijnmagazine/columns/
