Op ’t moment da’k dit schrieve he’w de feestdage achter de rugge en is ’t ni-je jaor nog jong en onbeschrevven. ’t Olde jaor he’w mooi af-eslotten met gezellege dage met familie en kammeräö, feestjes, borrels, warme Karst- en Ni-jaorswensen. Noo begunt ’t “normale” laeven weer veur zowiet a’j daor van könt spraeken, want op de boerderi-je is gin enen dag ’t zelfde.
Soms echter wal vermeujend: naoda’w meerdere dage late in bedde kwammen, dachte wi-j ’t ni-je jaor rösteg te können beginnen. Maor de koo dee al dree dage in ’t kraomhok leep bedach zich Ni-jaorsdag ’s aovend umme elf uur te gaon bevallen. Helaas ging ’t neet makkelek, ’t wodden een keizersnee en ton was ’t wèer kwart aover éne veurdat de boer in bedde lag.
Dan ha’j maor gin boer motten wodden heur ik oeleu denken, en dat is natuurlek ok zo. Vanmorgen ton ‘k met de kleine kelfkes an ’t voorn was heurn ik al volop bedrievegheid op ’t arf. D’r ston ne groten vrachtwagen te lossen bi-j de brokkensilo’s en bi-j ’t tanklokaal ston de melkrieder umme de melk op te halen. Effen later kwammen de KI en de veekoopman. Unzen partime medewarker is d’r vandage ok en schuf an bi-j de meddagpot. Ik hol wal van de laevendegheid dee ’t een bedrief met zich metbreg. Agrarische dienstverleners as de smid, de veearts, de loonwarkers, lev veranciers van stalmaterialen en schoonmaakmiddelen, reparatiediensten veur machines en zo meer komt regelmaoteg bi-j uns op ‘t arf.
Noo an ’t begin van 2025 vraog ik mi-j af hoo lange o’w nog vanzelfspraekend van al disse diensten gebroek könt maken. Um uns hen heure wi-j van ’t ene nao ’t andere boerenbedrief dat stopt. Zelfs jonge boeren wao’j ‘t neet van hadden verwacht kiest veur de opkoopregeling en besloet te stoppen. Dat hef een negatief effect op de umzet en warkgelaegenheid van al dee anverwante bedrieve, zodat ok daor stoppers bunt. ’t Is een onumkeerbaor proces dat de boetenwacht neet raakt zolange de supermarkten nog vol ligt. ’t Platteland zal echter ingriepend verandern, daor is gin weg van trugge. Positief of negatief?
De tied zal ’t leern.
Diana Abbink
___________________________________________________________________
Columns
Maandblad MIJN Magazine heeft columns van verschillende Achterhoekse columnisten. Meer columns? Klik dan op de bijbehorende link! https://www.helemaalachterhoek.nl/category/mijnmagazine/columns/
