Bienao iedernene verlangt naor mooie, warme zommerdage en lange zwoele aovende. Maor ’t is zoas met alles, elk veurdeel hef ok zien naodeel, want de zommer breg naost plezeer ok ziene iritaties en ongemakken met.
’t Begunt al bi-j de eerste zunneflikker, den eersten mooien veurjaorsdag: miegampen! Triomfantelijk zee’k ze vanonder een plint hen de kökken in marcheern. De eersten gedoog ik nog zon betjen, ’t bunt tenslotte ok wal nuttege beestjes. Vlietege oprumers bunt ‘t en a’j ze ’s good bestudeert dan könt ze krömmels verplaatsen dee groter bunt as zeezelf. Best wal knap eigelek. Maor a’k elken morgen ne krioelende massa vinne in de läöge köpkes op ’t aanrecht en andern spontaan begint an de peren op de fruitschale, begunt ’t mi-j toch te vervelen. En ze gaot helemaol ne grenze aover at ze tiedens ’t ontbijt aover miene botteram en de botterschöttel wandelt. Lever dee’k ’t neet, maor ik bestel manlief dat e lokdeuskes met mot brengen of ander materiaal dat de plaoge vlot en grondeg anpakt.
Verwachtingsvol plaats ik zo’n deusken op de route van de kleine piraten. Volgens de beschrieving op de verpakking mot ’t euvel dan gauw verholpen waezen, maor de eerste reseltaten bunt teleurstellend. Ze bekiekt ’t deusken van alle kanten, een paar waoghalzen kroept der zelfs in, maor hebt dan kennelek in de gaten dat ’t neet pluis is daorbinnen en waarschuwt de andern. Met ne baoge loopt ze der vervolgens umme hen en gaot wieter eurn gang zoas altied. Ze lacht mi-j nog net neet oet! Ik bun bange da’k den eersten stried van ’t seizoen al verspöld hebbe, en dan wet ik dat der nog allerhande kroepegrei meer veurbi-j geet kommen zoas vleegempen, vlegen, meikevers, processierupen, wöpsen, muggen, engerlingen en teggenwoordeg ok wantsen.
Ze bedriet ow de roeten, vret ow den hof kaal, staekt ow a’j ’s aovends boeten zit, of holt oe oet ’n slaop a’j net lekker in bedde ligt. Ongerief in wat wieter toch ’t mooiste seizoen van ’t jaor is. Wat dat betreft bun’k meer een wintermense, dan hölt dat ongesiefer zich tenminste rösteg
Maor ‘k wet: der bunt argere dinge en nao al dee raenge van afgelopen veurjaor kö’w wal wat zunne vitamientjes gebroeken.
Diana Abbink
___________________________________________________________________
Columns
Maandblad MIJN Magazine heeft columns van verschillende Achterhoekse columnisten. Meer columns? Klik dan op de bijbehorende link! https://www.helemaalachterhoek.nl/category/mijnmagazine/columns/
